Mae CAN wedi bod yn rhedeg ers wyth mlynedd, ac mae wedi dangos rhai o'r ffilmiau byr animeiddiedig gorau o'r gylchdaith gŵyl animeiddio fyd-eang, gan gynnwys ffilmiau byrion sydd wedi ennill Oscar a BAFTA. Mae'r digwyddiadau yn rhoi cyfle i bobl Caerdydd a thu hwnt wylio animeiddiad annibynnol ar y sgrin fawr neu o gartref a chwrdd â phobl o'r un anian.
Meddai Ellys Donovan, Prif Raglennydd Nosweithiau Animeiddio Caerdydd:
Rydym wrth ein bodd yn dod â phobl ynghyd yn Nosweithiau Animeiddio Caerdydd i wylio animeiddiadau gwych. Rydym yn gyffrous i fod yn agor cyflwyniadau am y tro cyntaf ac yn edrych ymlaen at weld yr holl waith anhygoel a fydd yn cael ei gyflwyno o bob rhan o'r byd.
Dros yr wyth mlynedd diwethaf, mae Nosweithiau Animeiddio Caerdydd wedi tyfu o gyrraedd cynulleidfa o 20 yn ystafell gefn tafarn yng Nghaerdydd, i gyrraedd cynulleidfaoedd misol o hyd at 200 yn The Underdog yng Nghaerdydd. Hyd yma, mae CAN wedi dangos dros 600 o ffilmiau animeiddiedig mewn lleoliadau yng Nghaerdydd ac ar-lein.
Cyflwyniadau nawr ar agor
Am y tro cyntaf, mae CAN yn agor cyflwyniadau, gan ganiatáu i wneuthurwyr ffilm gyflwyno ffilmiau animeiddiedig o unrhyw genre a hyd at 20 munud trwy FilmFreeway. Bob mis bydd rhaglen o ffilmiau byr yn cael eu dewis i'w dangos naill ai ar-lein neu mewn digwyddiadau byw. Bydd yr holl ffilmiau a ddangosir yn 2023 yn gymwys ar gyfer gwobrau Nosweithiau Animeiddio Caerdydd 2023, a bydd ffilm fuddugol yn cael ei dewis gan reithgor o weithwyr proffesiynol y diwydiant a chynulleidfa CAN.
